اللي مايبون دوام العصر وش مبرراتهم ووش عذرهم ..............................؟؟؟
سؤالي استفهامي واستنكاري وكل أنواع الاسئله والله اني مستغربه وميته استغراب
أنتم زي اللي يقولون له دوك خير قال مامن مخبى
من جد ياعلم ياهوه يا أوادم فتحو معاي شوي وركزو قبل تردون وافهمو لاتردون علي العنوان بس اقروا لي اخر الموضوع
الحين تثبيت وتثبتنا وصار لنا رقم وظيفي يعني مستحيل يلغى تثبيتنا أو يتغير شي بوضعنا وبما أن لنا رقم وظيفي في الخدمه فعلاوتنا بتصدر كل سنه وخدمتنا محسوبه
لانا موظفات مو قبل كنا عقود وعشان كذا علي كيفهم ناس يحسبون وناس لا
يعني ظمنا الرقم الوظيفي والعلاوه السنويه والخدمه في الدوله
وقالو لنا بنثبتكم مساااااااااااااااااء يعني بس ساعتين وربع بس بس متخيلين انتم
لا إذاعه أنتي مسؤله عنها ولا مناوبه صباح وظهر ولا نشاط "جمعيات سابقا" ولا اطباق خيريه ولا موجهات ومديرات تعاملهم الله بالخير
هذا غير نصابك اللي يتهاوشون عليه المعلمات كل بداية سنه كل وحده تبي مرحله معينه ماتبي غيرها وكل وحده ماتبي حصتها السابعه ولا الاولي و و و والاحتياط اللي معاد
صار احتياط صار لازم يفعل بحقيبة انشطه وتعلمينهم وش سويتي موب زمان تسحبين الكرسي وتقعدين عند الباب هذا غير الفصل اللي واصل الباب من الزحمه وهالجيل من
المراهقات اللي لا حيا ولامروه
أنا أتكلم من واقع تجربه أخر مره كنت بديله عام 1430 وتركتهم ورحت للأميه مع فرق الراتب وبعد المسافه لكن الله يحلل حريمنا عند هالنماذج اللي شفتها
الصبح كررررررررف موب بس حصصك ومادتك إلا عمل فوق عملك وتعب وضغط توصلين البيت تدورين الفراش مهدود حيلك هد ولاتصحين الا المغرب واذا صحيتي حضري ودوري وسائل تعليميه
واختبارات دوريه واساليب جديده بالتقويم لانعرفها ولاعاشرناها
مع كل هالتعب والغثا تهاوشون وتحلطمون في كل زاويه من هالمنتدى تقولون مانبي العصر من جدكم انتم احد يحصل راتب ووظيفه ساعتين وربع ويقول لا
لاتتحججون بسالفة موب حاسبين مافيه شي اسمه موب حاسبين خدمتنا والا علاوتنا خلاص مدام لك رقم وظيفي كل حقوقك بتوصلك كامله ولاتتحججون بسالفة اذا خلصت الاميه وين بيحطونا
بيحطونا بالقطاعات هذا شي مفروغ منه الحين المدن الرئيسيه استوعبت هالكم الهائل من المقولات خارجيا بتعجز عنا........؟؟؟؟
بعدين هذا كلام المسؤلين التثبيت مكاني حسب القطاع يعني اللي بالرياض بالرياض واللي بجده بجده
بعد كل هالكلام وش فيكم ع المسائي أحد يكره الراحه والدوام القصير ويدور الشقا والعنا؟؟؟؟
أنا عني اتمنا العصر مع اني انجليزي واذا جلست مسائي بنكرف بين 3 مدارس بس راضيه وموافقه اقلها مرتاحه نفسيا
رد: اللي مايبون دوام العصر وش مبرراتهم ووش عذرهم ..............................؟؟؟
بالله عليك ، مصدقة إنتي إنهم بيتركونك كذا
إحنا عارفين لهالوزارة وحركاتهم عشان كذا مانوافقهم ، ماينضمنون
الحين حسدو المعلمين وخلو إجازتهم شهر واحد بدل ثلاث شهور ، تبينهم يسكتون عليك في عصريتك ، إلا بيعصرونك لين تطلع عيونك
الحمدلله الذي بشكره تزيد النعم
رد: اللي مايبون دوام العصر وش مبرراتهم ووش عذرهم ..............................؟؟؟
شلون يعني بيتركوني كذا
أنا عارفه إنهم ماراح يتركوني النصاب 12 حصه اللي أقل عندها برامج محو الأمهي كثيره
مجتمع بلا أميه
وزاره بلا أميه
مشرفه مقيمه
تندب لدور التحفيظ
وأكيد إنهم بيخلقون برامخ جديده في الأميه مدام راح نتثبت عليها
الشي الوحيد اللي ماراح يسوونه وهذا كلام فوزيه الصقر هو إنهم يخلونا نمسك صباح وعصر وهذا اللي كان الجدال عليه
يعني اللي بالعصر ماراح تندب بعض الأيام صباح عشان تكمل النصاب تكمل نصابها بالعصر في البرامج المختلفه
والدوام اكيد بنكون زي الصباح نعامل معاملة معلمات الصفوف الأوليه يعني اجازتنا زي كل سنه مافي تغيير
وما استبعد إن الدوام يزيد والحصص تزيد عشان التثبيت يعني يكون الدوام 3 ساعات مثلا وتزيد الحصص لكل ماده عشان يكتمل النصاب
ومع كل هذا أفضل بكثير من الصباح
رد: اللي مايبون دوام العصر وش مبرراتهم ووش عذرهم ..............................؟؟؟
صح لسانك راضيه مرضيه والله نبح صوتي وانا اصايح ياعالم لاترفسون نعمتكم برجلكيم المصيبه والله زميلاتي وكل الي اعرف يبون مسائي ومباركين هالخطوه لكن ماهم راعين نت ومايفضون هالملسونات هالفئه القليله هي الي دوشتنا وتلقينهم نفس الاسماء هنا وفي منتدى الكبيرات نفس هالاعداد الي تنعد على الاصابع تنابح في كل مكان وتصايح وحاطين شوشرهم وهم ينعدون عد حسبنا الله ونعم الوكيل
رد: اللي مايبون دوام العصر وش مبرراتهم ووش عذرهم ..............................؟؟؟
يابنات أعتقد فيه خطط مستقبليه كبيرة في تعليم الكبار / منها راح يغيرون المناهج / فتح قسم خاص بالجامعة لتعليم الكباروالتعليم المستمر
ومن المفيد التفرغ لا العمل بدوامين ولا العمل بنظام المكأفاة
مصلحة العمل تقتضي ذلك
من الأفضل الأستمرار مع من لديهم خبرة لا من يكون جديد على هذاالمجال
أنتم تدربتم وتمكنتم غيركم ماينفع وأهم ماراح يضيعون الوقت في التدريب
واهم شيء في الموضوع قالوا لكم من تكون في قريه ماراح يكون دوامها فيه تكميل لأن مافي القرية إلا مركز واحد فقط
هذا عمل لو كل مايواجهنا نظام يخدم الصالح العام نعارض الأمور ماتضبط
صدقوني تثبيتكم بعدد ساعات أقل وراتب رسمي أمر تنفيذه إعجاز شيء محسودين عليه عشان كذا ماراح يخلونكم الرسميات اللي في الصباح في حالكم
عدد ساعات أقل وراتب زيكم زيهم أف أف
وغيرهذا اخ بس لو تشوفون أعداد المتقدمات عندناعلى العمل بمكافاة من معلمات الصباح تثبيتكم في المساء خرب عليهم
وظيفة وراتب عفواً أقصد راتب إضافي
نصيحة بنات خلوكم مع النظام خلاص مسائي مسائي لاتشوشرون على أنفسكم والله والله فيه من يسعى لمصلحتكم وأنتم ماتدرون
وياعالم مع الأيام الجاية وشو راح يصيرأو وشو ينزل من قرارات أو أنظمة
رد: اللي مايبون دوام العصر وش مبرراتهم ووش عذرهم ..............................؟؟؟
الداعيه الى الله وجهوني صباحي وانتهى الامر خربتها هالفئه ادعي عليكم والا وش اقول ماقول الا حسبي الله الذي لااله الا هو عليه توكلت وهو رب العرش العظيم
رد: اللي مايبون دوام العصر وش مبرراتهم ووش عذرهم ..............................؟؟؟
وشلون توجهتي صباحي ومن متى ؟
إدخال الرغبات يمكن عشان يكون فيه إعداد كبيرة راح يتحولون صباحي بالمفاضلة
وهذا بعد حصر الأعداد للمعلمات والحاجة الفعلية للمراكز
وبكرى وين فيه قالوا لكم تداومون
رد: اللي مايبون دوام العصر وش مبرراتهم ووش عذرهم ..............................؟؟؟
الله تعالى يكتب لنا الخير ويعطينا خير التثبيت و يكفينا شره امييين
رد: اللي مايبون دوام العصر وش مبرراتهم ووش عذرهم ..............................؟؟؟
وجهوني الان برساله المباشره غدا وباسم المدرسه انا بالرياض حسبنا الله
رد: اللي مايبون دوام العصر وش مبرراتهم ووش عذرهم ..............................؟؟؟
اسامة انتي مؤهل ثانوي ولا بكالوريوس واي منطقة