يقولون في سنه من السنين في رجال طيب وكريم ومعروف عند قبيلته بالسمعه الطيبه وصاحب حلال وخير كثير أسمه (أبو مناور) عمره في الاربعينات وأكثر البنات يتمنون يتزوجونه.....والرجال هذا متزوج ثلاث حريم من سنين وحريمه ثلاث شخصيات مختلفه
الاولى:تحب الشغل والحركه والدبكه في البيت وتهتم بالغنم والابل وتموت في خض اللبن وغزل شعر الغنم وتسوي السدو وتطبخ وكل تدبير البيت عندها وهاذي هوايتها وهمها الأول والأخير من تقعد من النوم وهي تلوي وتنسع بهالبيت وأمور زوجها.....
الثانيه: ماشاءالله عليها هوايتها تحمل وتولد شغاله تفريخ كل سنه مولود جديد وعندها عشره أولاد وهوايتها توكلهم وتشربهم وتقعد معاهم ومن تقعد من النوم وهي ترضع هذا وتوكل هذا وتنوم هذا (أوف الله يعينها) بس هاذي رغبتها شنسوي بعد
والثالثه: هاذي عاد كشيخه وتحب اللبس والخلاقين ومقابل المنظره ليل نهار والا تشق من هالخام وتخيط وتلبس وهاذي حمره وهاذي كحله وهذا حنا ولاهيه بنفسها بنت الحلال (بس تراها حلوه ومزيونه)يحق لها بعد شنقول ..
المهم ...الزوج عاد مو مرتاح مع حريمه كلش كل يوم مهموم ويفكر ليش أنا مو مرتاح وأنا شيخ عرب ومعروف والخير كله عندي وعندي عيال وحريم اللي تسنع البيت واللي تربي عيالها واللي تكشخ وتلبس بس فيه شي ناقصني ؟؟؟؟؟ وكل يوم على هالحال سرحان ويفكر شنو الشي اللي محتاجه ومو لاقيه بهالحريم وعنده واحد من ربعه قريب منه حيل وكل يوم يشكي له وهو يطمنه ويقول أحمد ربك الخير كله عندك (بس صاحبنا مومقتنع كلش إحساسه إنه في شي ناقصنا بس مشكلته مو عارف شنو)
وفي يوم من الايام راح مع صاحبه يتمشون بأرض الله الواسعه ويسولفون وهم يمشون شافوا من بعيد ثلاث بنات قاعدين يسولفون ويضحكون ولاهين بدنياهم ....وقفوا وقاموا يطالعون البنات من بعيد قال (أبو مناور) أبيك يافلان تروح للبنات وتشوفهم من قريب وتجيب لي خبرهم وتوصف لي أشكالهم وإذا قالوا وش تبي قول انا من ربع الشيخ (أبو مناور) وادور ناقته ضايعه وأسأل البنات عنها وتعال رد لي الخبر أنا رجال معروف وبيعرفوني البنات ومركزي مايسمح لي أسولف مع الحريم (شكله ناوي ياخذ الرابعه)
المهم إن صاحبه نفذ كلامه وراح للبنات ولقاهم بنات صغار عمرهم 15 و16 سنه ....سلم عليهم وردوا عليه السلام وسألهم ماشفتوا ناقه بيضا ضايعه من نياق الشيخ أبو مناور قالوا ثنتين لا والله ماشفناها......أما الثالثه قالت: والله والنعم بأبو مناور وسمعته الطيبه...أستغرب الرجال من كلامها وقال تعرفينه؟؟؟؟قالت أكيد منهو اللي مايعرفه بس الله يعينه سمعت إنه مو مرتاح بحياته وعنده ثلاث قبور مدفونه مالومه مالقى الحرمه اللي( تعقَله وتثقَله) سألها أنتي بنت منو؟؟؟ قالت: فلان الفلاني......تعجب الرجال من كلامها وراح يركض لأبو مناور وقاله كل كلام البنت ....أنهبل أبو مناور منها وزاد فضوله وحيرته( وش تقصد من كلامها وشنو يعني تعقَلني وتثقَلني أنا الحمدلله عاقل وثقيل )
المهم من ثاني يوم قال لصاحبه تعال معاي بأخطب البنت من أبوها ولازم أتزوجها قاله صاحبه : ياأبن الحلال بزر وصغيره وماهيب ذاك الزود ومافيها جمال وش تبي فيها كفايه حريمك الثلاث ماأترسوا عينك)
قال انا متزوجها غصب طيب ليما أعرف وش تقصد هاذي ماهيب بزر هاذي أكيد فاهمتني...
المهم تزوجها وحريمه طبعا ماهمهم شي كل وحده لاهيه في نفسها.....
وعقب كم يوم لقاها وحده عاديه وما سوت له شي جديد الشي الغريب فيها إنها مقابلته على طول وتقعد معه وتقوم معه وبس تطالعه وتبتسم وتسبقه تلبسه البشت وتسبقه تعطيه ماي وإذا طلع من البيت تعلقت فيه لاتطلع لاتطلع؟؟؟؟؟الرجال ماتعود ولايدري هالخبله شقاعده تسوي خخخخخ
أبتلش الرجال وقام يفكر هاذي والله النشبه جبت لي عله رابعه ماغير بزر جاهل متعلقه فيني وتلاحقني من مكان لمكان...
ضاق صدر الرجال وكره الحريم كلهم ويقوم ينادي كل زوجاته الأربع وقال :أنا والله رجال ماعاد أحب الحريم وأبي أعيش بروحي وألحين كل وحده تاخذ أغلى ماعندها في البيت وتروح بيت اهلها حتى لو تبون الذهب والفلوس بس خلوني بروحي(حاشه إكتئاب المسكين)
وماصدقوا خبر الأولى خذت غنمها وأبلها ولبنها وراحت/ والثانيه قشت عيالها وراحت /والثالثه خمطت ملابسها وخلاقينها وراحت (هو قال أغلى ماعندكم أمحق حريم)
أما الرابعه وقفت وقامت تطالعه بحزن قال وش تبين قالت بودعك وبروح ....ويوم نام المسكين في فراشه نادت وحده من جيرانهم وقالت لها تكفين شيلي معاي أبو مناور ....ويشيلونه وهو نايم وتوديه لبيت أهلها ويوم قعد الصبح لقا نفسه في مكان مايعرفه تلفت يمين يسار ولقى زوجته الرابعه قاعده عند راسه قال : هذا بيت منو وش السالفه ؟؟؟؟؟؟
قالت الشاطره :أنت في بيت أهلي
قال:وين الحريم الثلاث ؟؟؟؟قالت كل وحده شالت أغلى ماعندها في البيت وراحت لأهلها.
و أنت قلت البارحه كل وحده تاخذ أغلى ماعندها ؟؟؟وأنا ماعندي أغلى منك في الدنيا فكرت وشلتك بكبرك لبيت أهلي مابي لا فلوس ولاشي غيرك....
فتح حلقه المسكين وحس بدقات قلبه سريعه وأستانس (طلع يبي الحب المسيكين وقال في قلبه:إيه هذا الشي اللي أدوره من سنين)وكملت الشاطره :وأنا يوم أقابلك الليل والنهار وبس أطالع فيك من كثر غلاك في قلبي ماأحب أفارقك دقيقه ولاطلعت من البيت أحس بضيقه وأقعد أنطرك ليما ترد للبيت ...
قال: طيب وش تقصدين بأن زوجاتي ثلاث قبور مدفونه؟؟؟قالت:مثل القبر اللي داخله ميت وحريمك قلوبهم ميته وماعندهم إحساس..
ويوم أقول تعقَلك وتثقَلك أقصد تعقلك عن شوف الحريم الباقيات وتثقلك بالغلا والمعزه...
أنهبل الرجال من الكلام وحس بإحساس ماعمره حس بحياته قاال :تدرين أمشي معاي البيت تكفين تو ماعرفت شنو اللي ناقصني وحريمي الثلاث طلقتهم بالثلاث بلا رجعه
