قصيدة جميلة عن الوالدين ...
ياحظ من عنده عجوز وشايب
ولا حدى الأثنين ياسعد عينه
وجودهم يجلي النكد والمصايب
وياحظ من يدرك حدى والدينه
ابوٍ كبير وله علومِ طرايب
وكل المراجل حازها في يمينه
وأمٍ إلى شافه تهون المصايب
تسعد ببره لويقبل جبينه
ترفع يدينه للولي بالمطالب
وترجي ولي العرش يسعد سنينه
أقدامها تحته جنانٍ رطايب
وأبوك عزه في توالي سنينه
وبيتٍ بدون كبار مثل الخرايب
واللي فقدهم قولو الله يعينه
نور البيوت ويجمعون الحبايب
وكل السلوم الطيبه جامعينه
فيهم لقساوات اللــيالي غلايب
مروضين الوقت ومطوعينه
اخضع لهم وإنذل إذا كنت راغب
في جنــــــةٍ ياعلنا ساكنينه
وازرع وتجني لكل شيٍ عقايب
وكلٍ يبي ياخذ على قد دينه
وحذر تقول اجيب واحد يراقب
ويخدم أبوي وراتبه دافعينه
وأمك تقول الخادمه له تواضب
بغريفةٍ بالحوش ومكرمينه
لعيوننا كم جت لهم من متاعب
ووقتٍ شحيح وليلهم ساهرينه
ومهما نسوي لجلهم فهو واجب
شيءٍ قليل وحقهم هاضمينه
اغنم زمانك قبل جمع الكسايب
ياسعد منهو بر في والدينه[/COLOR]
رد: قصيدة جميلة عن الوالدين ...
اللهم أجعلنا بارين بوالدينا .. أحياءا.. وأمواتا
رد: قصيدة جميلة عن الوالدين ...
اللهم أحفظ والدينا من كل شر وارزقنا البر بهما
رد: قصيدة جميلة عن الوالدين ...
رد: قصيدة جميلة عن الوالدين ...
