http://www.youtube.com/watch?v=yBMy4...eature=related

الحمد لله قلبي محسن النيه
دايم وانا اعطي و لافكرت في ذاتي
أعامل الناس بإخلاص ومثاليه
ياكثر ما اكتم عن المخلوق مشكاتي

**************************
ومن شافني قال ياسعده ويا هنيه
ماهو بداري عن همومي وآهاتي
اشوم نفسي عن الهفوات والسيه
وأرفع عيوبي و أحاول أجمع شتاتي

**************************
و أحاسب النفس بالروحه وبالجيه
أخشى هوى النفس يلحقها ملاماتي
وإن شفت ناس بنقل الهرج مبليه
حمدت ربي على نعمة معافاتي

**************************
وليا طلبني رفيقي وانتخا فيه
جيته من أقصاي أطوي له مسافاتي
وإن ضاق صدري وزادت في الحشا كيه
سألت ربي يخفف من معاناتي

**************************
والنفس بالكون مأموره ومنهيه
ولابد ما قدر الرحمن ما ياتي
ويالله يا عالم باللي قسم ليه
تغفر ذنوبي وتجبر كل عثراتي

**************************
( الحمد لله )

كلمات : فهد الجبر

أداء : صالح اليامي