هذي نهايات الجفاء يالزعوله
وهذا حصيل اللي زرعتيه بيديك
أصبح معك قلب ٍ يبيع بسهوله
وأنا معي قلب ٍ من سنين شاريك
قد قلت لك في مامضى يالجهوله
ونصحت لكن للأسف مانفع فيك
لاتحسبين أن المفارق بطوله
أو تأخذك بالأثم عزه وتغويك
ولاتأمنين الهجر عرضه وطوله
لابد صكاته تمرك وتحويك
العمر دوراته علينا عجوله
وأخاف من يوم ٍ يعزونني فيك
وأنثر دموع العين ماهي خجوله
عسى الولي مايبتليني ويهديك
مافات مات وكاتب الله حصوله
عودي على قلب ٍ يودك ويغليك