أكيد بعضكم راح لمستشفى الملك سعود والمسمى جزافا بهذا الاسم فالواقع يفرض تسميته حوش البيطره وبصراحه هذا واقع عايشته يوم السبت
إبتدأ صباحي بالدوران في شوارع الرياض لاجد مستشفى حكومي مشهور ولكن للاسف مندس بين الاحياء وكنه يقول لاحد يشوفني ,المهم يابنات دخلت وقعدت أدور على الكونتر اللي يوزعون فيه الارقام مثل كل مستشفيات العالم وحتى مستشفيات الهنود الحمر بس اللي صار اني لقيت ناس متزاحمين على ثلاث ابواب وشباك صغير مكتوب عليه تسليم العينات المهم قلت بسأل اللي في الشباك وين أحصل ارقام او وين اروح وهذا الحين تونا في الشارع مو داخل المستشفى والعيادات ومامداني أقول لو سمحت إلا والرجال معطيني نتيجه تحليل ونتيجته سليم والله لولا الاسم مختلف لانحاش به بس للاسف اسمها مكتوب وقديم بعد فشله يوم صرت معلمه رسميه آخذ اسم قديم هههههه
قلت هذا مهوب لي انا توني مابعد حللت كل هذا وانا احسب الدعوى تحليل دم أثر الدعوى فيها مطرسه قال اتبعي السهم يأختي وأطالع الجدران مكتوب عليها لفحص الوظائف سهم يمين ثم سهم يسار ثم سهم متجه للسما مدري وين بطير له أثر الورقه محركها الهوا وأخير والله يابنات أني وصلت ثلاجه الموتى ماتشوفون الا غبرتي خفت يدخلوني قبل اترسم والبواب مدري الحارس يناظرني ويتبسم كنه يقول هذي صيده راهيه
بعدها دخلت مكان كنه مسرح يوزعون فيه مواعيد أقربها في 24/4 ويييييييين كل اللي بقى لي تحليل هروين قصدي مخدرات وتبوني ارجع للرياض مره ثانيه معصي وأفرك بدون ماخذ موعد واروح للحارس حق المختبر وأسوي حركات الصلب وهي كالاتي ( دخلت شنطتي الماركه تحت العباه وطلعت جوال المدرسه اللي بدون كميرا خليته في يدي عشان يحسبه جوالي ويرحمني وقلت له جعل والديك في الجنه ترانا جايين على النقل وحجزنا للرجعه العصر والله اني مخليه بزيراتي وراي تكفى دخلنا جعلك تدخل الجنه ووالديك مامداني اكمل الا وهو ماخذ أرواقي ورايح يركض يالله اني لحقته لايضيع عني ويسلم اوراقي للممرضه ويقول دخليها تراها قريبتي وقتها بغيت أستنذل واقول تراه يكذب هههه)
الحين إبتدا زحام المختبر لان كل اللي سبق كان برا العيادات والمختبر في هذا الزحام عشان يعطونك العلبه حقه التحليل لازم يضغطونك ومن سبق لبق لان مافيه نظام زلا ارقام ولأول مره أعرف قيمه الطول لاني شميت روائح غريبه تشبه ريحه الوايت البرتقالي أظن عرفتوه هههههه ومن شده الظغط صرخت فيهم (من ورى أظغطوا ودفوا ماعندي مشكله بس من قدام لااااااااااااا مابي أفرط في العينه ههههههه على بالي بدخل بعد ربع ساعه تاليتها قعدت ساعتين لين أصفرت عيوني من زود حرصي على العينه في إنتظار يعطوني العلبه ..... ويوم قربت عند الباب إلا وتطلع علينا ذيك الحبشيه اللي ماذكر من ملامحها الا الروج الاحمرلأن مالها ملامح اصلا وقالت بالحرف الواحد يابهايم أنتظروا طبعا ماستغربت وجود مثل هالموظفه نظرا لمستوى المستشفى عامه المهم تعطيني القويطي هههه
بعد ماعطونا العلبه رحنا لدورات المياه والمصيبه انهم قاطعين الماء عنها عشان ماحد يغش هههههه طيب أفرضوا وحده اندمجت وسوت أكثرمن الواجب وش تسوي؟؟؟
طيب يامستشفى الهم وش دراكم اني فلانه بنت فلان اللي اسمها في الورقه ممكن تجي صديقتي او قريبتي وتسوي التحليل بدالي وأقطعوا الماء على كيفكم ياأذكياء
بس قمه الاحراج أذا طلعتي بالعينه وجت وحده تعرفك بتسلم عليك هههههههههههه وش تقولين ماغسلت يدي ههههههههههه
والحمدلله خلصت التحليل والنتيجه بكره وخلصنا من مسلسل هدر الكرامه الادميه في مستشفى الصدريه