يازماني ...

http://www.youtube.com/watch?v=FTA87aY88W8

يا زماني كل ما خلت مرزمـة الغيـوم
استخالـت وأبعـدت والعيـون تلدهـا
والرجا من جاير الياس عيّـا لا يقـوم
وضيّق صدور الهقاوي وبيّـح سدهـا
قال لي لا تتعب النفس والوضع محسوم
ولا تعنّا والمقاديـر مـا أحـدٍ ردهـا
قلت له لا تندب الحظ وتشيـل الهمـوم
وكل حاجة في الزمن فيه حاجة ضدهـا
التحلي بالصبـر والمثابـر والعـزوم
توصل النفـس لمناهـا وغايـة ودهـا
والتجارب مدرسة والتعلـم كـل يـوم
والدروس تشيب الـروس يـوم نعدهـا
والحياة بحور يغرق بها اللي ما يعـوم
كل نوبٍ يصطفق جزرها مـع مدهـا
والمراجل صرح يبنى على طيب السلوم
والغبي اللـي ليـا مـن بناهـا هدهـا
وللظروف سياسةٍ بالدفـاع وبالهجـوم
مرةٍ نغـزي عليهـا ونـوب نصدهـا
بين لافوح المشاتي ولاهـوب السمـوم
نسبر لشرد الفرص والحظـوظ نهدهـا
والسباع تصوم لو كان ما تنوي تصـوم
الزمـان يحدهـا والحمـى محتـدهـا
ما بقى إلا تسهر الليل كلـه مـا تنـوم
وتقنب بعال الجبـل والسنـون تحدهـا
وكل سبعٍ صار في تالي أيامـه خـدوم
لو جمع بين القسا والشجاعـة والدهـا